Атбасар вокзалы қайта жаңартылып, жолаушыларға есігін ашты

Фото: ҚТЖ

Ақмола облысында Атбасар станциясының теміржол вокзалын қайта жаңарту аяқталды. 1956 жылы салынған ғимарат жаңартылып, кеңейтілді - оның ауданы 660,6-дан 823,4 шаршы метрге дейін өсті, деп хабарлайды Elordainfo.kz «Қазақстан темір жолы» ҰК» АҚ баспасөз қызметіне сілтеме жасап.

Вокзалда шатыр, қасбет және ішкі үй-жайлар, инженерлік желілер, перрон және оған іргелес аумақ толығымен жаңартылды. Қайта құру кезінде қазақстандық өндірістің материалдары қолданылды. Қайта құру Мемлекет басшысының тапсырмасы бойынша іске асырылып жатқан елдің темір жолы вокзалдарын жаңғыртудың ауқымды бағдарламасы шеңберінде жүргізілді.

«Вокзал жолаушылар үшін ыңғайлы және қауіпсіз болды. Қосымша эвакуациялық жолдар салынып, мобильділігі төмен жолаушыларға арналған пандуспен жабдықталды, жаңа жиһаз және жабдық орнатылды», - делінген хабарламада.

Вокзал күн сайын шамамен 310 жолаушыға қызмет көрсетеді. Станция арқылы Атбасарды Астана, Қостанай, Семей, Қарағанды, Ақтөбе, Арқалық, Шу, Маңғыстау, Бейнеу және Орал қалаларымен байланыстыратын 16 жолаушылар пойызы өтеді.

Қайта жаңарту «Қазақстан темір жолы» ҰК» АҚ-ның өз қаражаты есебінен Қазақстан Республикасының Үкіметі, Көлік министрлігі, «Самұрық-Қазына» АҚ және Ақмола облысы әкімдігінің қолдауымен жүргізілді.

Еске салсақ, еліміздің 100 теміржол вокзалында құрылыс-монтаж жұмыстары аяқталды.