«Air Astana»-да 1 млрд теңгеден астам қаржы жымқыру ісі бойынша үкім күшінде қалды

Фото: Оңалхан Өнерхан

Алматы қалалық сотының қылмыстық істер жөніндегі апелляциялық алқасы «Air Astana» АҚ-да 1 млрд теңгеден астам қаражатты жымқыру және қылмыстық кірістерді заңдастыру ісі бойынша үкімді өзгеріссіз қалдырды, деп хабарлайды Elordainfo.kz Бас прокуратураға сілтеме жасап.

Ведомство мәліметінше, қылмыстық схеманы ұйымдастырушы 9 жылға, оның екі сыбайласы 8 жыл 6 айға бас бостандығынан айырылды. Сондай-ақ барлық сотталғандардың мүлкі тәркіленіп, оларға 5 жыл мерзімге коммерциялық ұйымдарда лауазымды қызметтерді атқаруға тыйым салынды.

«Сот жәбірленуші тараптың 1 млрд теңгеден астам сомаға берген азаматтық талап-арызын қанағаттандырды. Тәркіленген мүлік келтірілген шығынды өтеуге бағытталады», делінген хабарламада.

Апелляциялық инстанция қорғаушы тараптың уәждерін қарап шығып, үкімді өзгеріссіз, ал шағымдарды қанағаттандырусыз қалдырды.

Еске салсақ, Қостанайда құны 582 млн теңгені құрайтын жайылым жерлер мемлекетке қайтарылды.