Павлодар облысында стратегиялық каналдан заңсыз су алу тоқтатылды

Фото: Су ресурстары және ирригация министрлігі

Павлодар облысының табиғатты қорғау полициясы Ертіс бассейндік су инспекциясымен бірлесіп Қаныш Сәтбаев атындағы каналда су ресурстарын заңсыз пайдалану фактісін анықтады, деп хабарлайды Elordainfo.kz ІІМ баспасөз қызметіне сілтеме жасап.

Құқық бұзушы Ақсу ауылдық округінің Евгеньевка ауылының маңында суармалы алқапты суару кезінде анықталды. Белгілі болғандай, жергілікті ауыл шаруашылығы өндірушісі заңды айналып өту үшін стратегиялық арнадан су алған.

– Су алу рұқсат беру құжаты мен келісімсіз жүзеге асырылды. Ресурстарды заңсыз айдау судың ұтымды бөлінуіне қауіп төндіреді. Бұл қазір суару маусымының қызған шағында, фермерлердің сумен жабдықтау қажеттілігі бірнеше есе артқан кезде өте маңызды, – деп түсіндірді Ақсу қаласының полиция бөлімінің бастығы Айдар Сламбеков.

Барлық жиналған материалды полицейлер процедуралық шешім қабылдау үшін Ертіс бассейнінің су инспекциясына тапсырды.

Еске сала кетсек, Су ресурстары және ирригация министрлігі жаңа Су кодексі бойынша су пайдаланудың тәртіптерін түсіндірді.