Астанада BaiQymyz гастрофестивалі аясында жылқы көрмесі өтіп жатыр

Фото: Алина Имамбаева

Астанада BaiQymyz халықаралық гастрофестивалі аясында «Арғымақ» ат-спорт кешенінің аумағында Asia Kokpar LEAGUE ER QANATY-мен бірлесіп ұйымдастырған ауқымды ат-спорт бағдарламасы өтуде, деп хабарлайды Elordainfo.kz.

Екі күн бойы фестиваль қонақтары көкпардан, аударыспақтан жарыстарды, шөген ойынын, ат квиддичін, жылқы шеруін, шабандоздардың көрме қойылымдарын және қазақ ат мәдениетінің бай дәстүрлерін көрсететін басқа да ойын-сауық сайыс түрлерін тамашалай алады.

Бағдарламаның ерекшеліктерінің бірі әртүрлі тұқымды жылқылардың көрмесі болды. ER QANATY жобасының авторы Әділ Орынбасарұлы атап өткендей, биыл креативті индустрияларды дамытуға ерекше көңіл бөлінген.

«Фестиваль аясында алғаш рет бірыңғай тұжырымдамада дәстүрлі шөген және ат спорты – квиддич ойыны ұсынылды. Ұлттық ат спорты өнерінің заманауи ойын-сауық форматтарымен үйлесуі жаңа аудиторияны тартуға және жастардың ұлттық спорт түрлеріне деген қызығушылығын арттыруға арналған. Өткен жылы Ат спорты бағдарламасына 10 мыңға жуық адам келіп, биыл одан да көп қонақтар болады деп күтеміз», - деді жоба авторы.

Ат спорты бағдарламасы 12 шілдеге дейін жалғасады және ұлттық мұраны, спортты, мәдениетті және заманауи отбасылық демалыс форматтарын біріктіретін фестивальдің орталық алаңдарының бірі болып қала береді.

Еске сала кетейік, Астанада ауқымды халықаралық BaiQymyz-2026 гастрофестивалі өтіп жатыр.

Алина Имамбаева