TikTok тікелей эфиріндегі былапыт сөздері үшін жамбылдық әйелге айыппұл салынды

Фото: Magnific.соm

Байзақ аудандық соты әйелге қатысты ұсақ бұзақылық фактісі бойынша әкімшілік құқық бұзушылық туралы істі қарады, деп хабарлайды Elordainfo.kz Жамбыл облысының сотына сілтеме жасап.

2026 жылдың шілдесінде Байзақ ауданының тұрғыны Түймекент ауылындағы үйінде өзінің TikTok аккаунтында тікелей эфир өткізген. Трансляция кезінде ол бірнеше рет былапыт сөздер айтып, айналасындағыларға құрметсіздік танытып, қоғамдық тәртіпті бұзған.

Кінә хаттамамен, әлеуметтік желіні мониторингілеу материалдарымен, әйелдің түсініктемелерімен және тікелей эфирдің бейнежазбасымен дәлелденді.

Сотта азаматша кінәсін мойындамады. Оның пікірінше, эфир ақша табудың тәсілі болған, ал оның сөздері белгілі бір адамға арналмаған.

ӘҚБтК 434-бабы 1-бөлігінің санкциясы 20 АЕК мөлшерінде айыппұл салуды немесе 20 сағаттан 60 сағатқа дейінгі мерзімге қоғамдық жұмыстарға тартуды не 5-тен 15 тәулікке дейінгі мерзімге әкімшілік қамаққа алуды көздейді.

Сот кәмелетке толмаған балалардың болуын жеңілдететін мән-жай ретінде таныды. Ауырлататын мән-жайлар анықталған жоқ.

Сот қаулысымен әйел ӘҚБтК 434-бабының 1-бөлігі бойынша кінәлі деп танылып, оған 86 500 теңге көлемінде айыппұл тағайындалды.

Қаулы заңды күшіне енген жоқ.