Электрондық цифрлық қолтаңба кілттерін қайта шығару кезінде қосымша тексеру кезеңі енгізілді

Фото: Оңалхан Өнерхан

«Ұлттық ақпараттық технологиялар» АҚ pki.gov.kz жеке кабинетінде электрондық цифрлық қолтаңба кілттерін қайта шығару кезінде қосымша тексеру кезеңі енгізілгенін мәлімдеді, деп хабарлады Elordainfo.kz.

Кілттерді қайта шығару кезінде қосымша тексеру екі жолмен жүргізіледі:

SMS арқылы – Қазақстан Республикасының мобильді азаматтар базасында тіркелген нөмірге бір реттік код жіберіліп, оны енгізу арқылы;

eGov Mobile қосымшасындағы цифрлық құжаттағы кодты енгізу арқылы.

Айта кетейік, бұл механизм Қазақстан Республикасының бейрезиденттеріне қолданылмайды, себебі олардың телефон нөмірі Қазақстан Республикасының мобильді азаматтар базасында тіркелмеген.

Қабылданған шара пайдаланушылардың электрондық цифрлық қолтаңба кілттерін заңсыз қолданудан қорғауға, қауіпсіздікті арттыруға бағытталған және кілттерді қайта шығару процесін сенімдірек етеді.

Бұған дейін «ЦОН» мобильді қосымшасында «Сенімхат рәсімдеу» цифрлық сервисі енгізілгенін жаздық.

#электрондық цифрлық кілт