Іздеу 
«Көктем симфониясы»: Астанада көшбасшы оқушылардың салтанатты балы өтті
Ернұр Қайнар
Астанадағы М.Өтемісұлы атындағы Оқушылар сарайында Халықаралық әйелдер күні қарсаңында «Көктем симфониясы» атты салтанатты бал өтті, деп хабарлайды Elordainfo.kz қала әкімдігінің ресми сайтына сілтеме жасап.
Қалалық Білім басқармасының қолдауымен өткен мерекелік жиын мектепішілік Парламент көшбасшыларының қатысуымен өткізілді. Оған елордалық білім беру ұйымдарының 117 көшбасшысы қатысты.
«Бұл әсем кеш бірнеше жылдан бері өткізіліп, жақсы дәстүрге айналып келеді. Ол елорданың ең белсенді, бастамашыл, жауапкершілігі жоғары, дарынды оқушылардың басын қосатын алаңға айналды.
Кешке қадірлі қонақ ретінде ардақты аналар мен әжелерді шақырып, мерекелік көңіл-күй сыйлауды мақсат еттік», – деді М.Өтемісұлы атындағы Оқушылар сарайы директорының орынбасары Айымгүл Жабаева.
Кештің салтанатты бөлімі «Созвездие» спорттық-балдық би ансамблінің хореографиялық композициясымен ашылып, кейін халықаралық, республикалық байқаулардың лауреаты Нұрай Сайынова өз шығармашылығын паш етті.
Мерекелік бағдарлама оқушылардың дәстүрлі вальсімен жалғасты. Сонымен қатар заманауи музыкалық композициялар мен түрлі флешмобтар та қойылды. Осылайша, аналарға, педагогтерге, тәлімгерлерге арналған алғыс кеші ерекше есте қалды.
Еске салсақ, елорда мектептері мен балабақшаларында «Анаға арнау» мерекелік хор челленджі өтті.
