Іс-шараға ардагерлер, этномәдени бірлестіктердің өкілдері, түрлі сала қызметкерлері мен аудан тұрғындары қатысты.

Мерекелік жиында аудан әкімі Нұрболат Бекетаев пен аудандық ардагерлер кеңесінің төрайымы Ұлмекен Құсайынова құттықтау сөз сөйлеп, Республика күнінің ел Тәуелсіздігі мен халық бірлігінің нышаны екенін атап өтті.
Мемлекеттік Әнұраннан кейін алаңды ән тербеді. Көрермен назарына патриоттық және халық әндері ұсынылды. «Туған елім», «Менің ақ қалам», «Матур баса», «Сүйел», «Басале» әндері шырқалып, қатысушыларға мерекелік көңілкүй сыйлады.

Сахна төрінде «Ялқын» және «Дуслык» ансамбльдері, сондай-ақ вальс, фокстрот және танго билерін орындаған «Денс» және «Шабыт» ардагерлер би ұжымдары өнер көрсетті.
Бағдарламаның қорытынды сәтінде Нұрболат Бекетаевтың сөзіне жазылған «Жайнай бер, жас Жаңа Қазақстан» әні орындалды. Қатысушылар көк туды көтеріп, әнді бірге орындап, елдің болашағына деген сенім мен патриоттық рухты білдірді.

Ерасыл Нұрлыбекұлы