Іздеу 
Елордада чемпионатқа қатысқан балықшылар қайырымдылыққа да атсалысты
Жәнібек Амангелді
Астанада өткен қармақпен балық аулау чемпионаты спорт пен қайырымдылықты тоғыстырды, деп хабарлайды Elordainfo.kz Астана қаласының Спорттық балық аулау федерациясына сілтеме жасап.
1 наурыз күні Есіл өзенінде жылтыр қармақпен (мормышка) спорттық балық аулаудан Астана чемпионаты өтті. Ауқымды шараны Астана қаласының Спорттық балық аулау федерациясы ұйымдастырды. Жарыста еліміздің мықты спортшылары бір алаңға жиналып, қала өмірінде спорт пен әлеуметтік жауапкершіліктің үйлесімді үлгісін көрсетті.
Жарыста барлық ереженің сақталуын кәсіби төрешілер алқасы қамтамасыз етті. Бас төреші қызметін Бақытжан Әділбеков атқарды, төреші хатшы міндетін Андрей Рогов орындады, ал балық аулау аймақтарында төреші ретінде Данил Коротовский жұмыс істеді.
Ұйымдастыру комитеті алдын ала жарысқа дайындық жұмысын жүргізді. Өзеннің түбі мен ағысы ескеріле отырып балық аулайтын жерлер белгіленді, төрешілер штабы құрылды, марапат қоры жасақталып, жеңімпаздар мен жүлдегерлерге арналған кубок, медальдар және грамоталар дайындалды. Жарыс бағдарламасы бірнеше міндетті кезеңнен тұрды. Қатысушыны тіркеу, салтанатты ашылу рәсімі, балық аулайтын құралдарды техникалық бақылау, балық аулау кезеңі, нәтижені есептеу және марапаттау рәсімі. Барлық кезең тәртіпке сәйкес, жоғары деңгейде ұйымдастырылды.
Наурыз айының бірінші күні ауа райы бұл күні балықшыларға қолайлы болып, турнир шынайы спорттық бәсеке жағдайында өтті. Қатысушыларға барлық жағдай жасалып, олар балық аулау тактикасы мен техникасына толық назар аудартуға мүмкіндік алды.
Тартысты дода қорытындысы бойынша чемпионат жеңімпаздары анықталды:
Бірінші орынды - Абай Мұқанов иеленді.
Екінші орынды - Антон Родионов жеңіп алды.
Үшінші орын - Амангелді Салықовқа бұйырды.
Ал «Big Fish» арнайы номинациясында (ең ірі балық аулағаны үшін) Вячеслав Байгужин жеңімпаз атанды.
Өткен чемпионаттың ерекшелігі - оның қайырымдылық сипатында өтуі болды. Жарыс барысында спортшылар ұстаған барлық балық жануарларға арналған баспанаға тапсырылды. Бұл игі бастаманы «Добро рулит» клубының еріктілері жүзеге асырды. Аталған клуб - Астана қаласының Спорттық балық аулау федерациясының жастар қанаты.
Сонымен қатар, клуб белсенділері бұл күні тек жануарларға көмек көрсетумен шектелген жоқ. Олар қаладағы аз қамтылған отбасыларға арналған азық-түлік себетін дайындап, таратып берді. Осылайша, 1 наурыз күні Есіл өзенінің жағасында екі маңызды іс қатар атқарылды. Беделді спорт жарысы ұйымдастырылып, көмекке мұқтаж жандарға нақты қолдау көрсетілді.
Еске сала кетсек, бұған дейін СҚО-да балықтар қырылмауы үшін көлдерді аэрациялау жүргізіліп жатқанын хабарладық.
