Астанада танысының көлігін рұқсатсыз сатып жіберген азамат ұсталды

Фото: magnific.com

Астана қаласының криминалдық полиция қызметкерлері аса ірі көлемдегі алаяқтық дерегі бойынша 29 жастағы елорда тұрғынын ұстады, деп хабарлайды Elordainfo.kz ІІМ баспасөз қызметіне сілтеме жасап.

Анықталғандай, күдікті бұрыннан таныс азаматының сеніміне кіріп, оған тиесілі ақ түсті Toyota Camry автокөлігін суретке түсірген. Кейін бұл фотосуреттерді пайдаланып, автокөлікті өзге танысына сатылымға ұсынып, арзан бағаға өткізген. Алайда көлік өзіне тиесілі емес екенін және оны сатуға ешқандай құқығы жоқ екенін сатып алушыдан жасырған.

Осының салдарынан көлік иесіне 11 миллион 500 мың теңге көлемінде материалдық шығын келтірілген. Жәбірленуші полицияға жүгінгеннен кейін жүргізілген жедел іздестіру іс-шаралары барысында күдікті анықталып, ұсталды.

«Қазіргі уақытта ол уақытша ұстау изоляторына қамалды.

Аталған факті бойынша сотқа дейінгі тергеу жүргізілуде», - делінген хабарламада.

Полиция азаматтарды көлік құралын үшінші тұлғаларға берер алдында барлық мәмілені заң талаптарына сай рәсімдеуге шақырады. Тіпті таныс адамдармен арадағы келісімнің өзі құжат жүзінде бекітілуі тиіс. Сенімге негізделген ауызша келісімдер алаяқтардың құрбаны болуға себеп болуы мүмкін.

Еске сала кетейік, Астанада жол апатын жасап, қашып кеткен жүргізуші ұсталды.