Іздеу Елімізде байланыс қызметтерін көрсету қағидалары өзгереді - министрлік
Думан Аманжол
Жасанды интеллект және цифрлық даму министрлігі байланыс қызметтерін көрсету қағидаларына маңызды өзгерістер енгізді, деп хабарлайды Elordainfo.kz ведомствоның баспасөз қызметіне сілтеме жасап.
Мәліметке сәйкес, 18 маусымда шыққан бұйрық азаматтарға барынша жайлылықты қамтамасыз етуге және олардың цифрлық ортадағы құқықтарын сенімді қорғауға бағытталған.
Енді қосымша ақылы байланыс және интернет қызметтері абоненттің екі мәрте келісімімен ғана қосылады, оны жеке кабинет, SMS, қоңырау немесе USSD-сұраныс арқылы растауға болады. Сонымен қатар, операторларға жіберіп алынған қоңыраулар туралы хабарлау үшін қысқа «маяк» қоңырауларын пайдалануға толықтай тыйым салынады. Бұған дейін бұл қызметті өшіру мүмкіндігі болған, алайда тәжірибеде ол екі абоненттің де — қоңырау шалушының да, қоңырауды қабылдаушының да — бұл опцияны өшірген жағдайында ғана жұмыс істейтін. Енді бұл техникалық қайшылық жойылды және «маяктардың» орнына ыңғайлы әрі түсінікті SMS-хабарлама форматы келеді.
Сондай-ақ пайдаланушылар операторлардың жарнамалық және ақпараттық таратылымдарынан оңай бас тартуға мүмкіндік алды. Одан бөлек, 14 жасқа толмаған балаларға нөмірлерді тіркеу кезіндегі қауіпсіздік шаралары күшейтілді: енді бұл процедураны тек заңды өкілдері биометриялық сәйкестендіру арқылы жүргізеді, бұл ретте кәмелетке толмаған бір балаға тек бір нөмір ғана рәсімделеді.
Жаңа нормалар 28 маусымнан бастап күшіне енеді. Мамандар бұл өзгерістер ЖИЦДМ-нің тұтынушылардың құқықтарын қорғау және цифрлық сервистердің сапасын арттыру жүйелі жұмыстарының бір бөлігі, сондай-ақ биыл жарияланған ЖИ жылындағы «халық үніне құлақ асатын мемлекет» қағидатына сәйкес келетінін атап өтті.
Еске салсақ, Мемлекеттік қызмет істері агенттігінің бастамасымен «Цифрландыру мен жасанды интеллект дәуіріндегі Адам. Әлеует. Қоғамдық құндылық» тақырыбында халықаралық GovHR форумы өтті.
