Іздеу Астанада «Жасыл ел» жасағының жастары экоакция өткізді
Ернұр Қайнар
Елордада «Таза Қазақстан» экологиялық бастамасы жүзеге асып жатыр. Осы жұмыс аясында Астанада «Таза бейсенбі» акциясы өткізіліп, оған «Жасыл ел» жастар еңбек жасағының 100-ден астам белсендісі қатысты, деп хабарлайды Elordainfo.kz қала әкімдігінің ресми сайтына сілтеме жасап.
Экоакция «Алматы» ауданының қар полигоны аумағында ұйымдастырылды. «Жасыл ел» сарбаздары тұрмыстық және құрылыс қалдықтарын, пластик қоқыстарды, шыны бөтелкелерді, қағаздарды және қоршаған ортаны ластайтын басқа да материалдарды жинады. Қатысушылар қоқысты сұрыптап жинауға ерекше көңіл бөлді: пластик, шыны және қағаз өнімдері алдағы уақытта қайта өңдеу үшін бөлек іріктелді.
Ұйымдастырушылардың айтуынша, мұндай экологиялық іс-шаралар қалалық ортаның тазалығын сақтауға ғана емес, сонымен қатар халық арасында экологиялық мәдениетті қалыптастыруға бағытталған. Акцияның негізгі міндеттері – қалдықтар көлемін азайту, азаматтардың экологиялық жауапкершілігін арттыру, санитарлық қауіпсіздікті қамтамасыз ету және қоғамның назарын қоршаған ортаны қорғау мәселелеріне аудару.
«Бүгін «Таза Қазақстан. Астана – тазалық пен тәртіптің үлгісі» экологиялық акциясы аясында «Жасыл ел» белсенділері ауқымды экологиялық сенбілікке қатысты. Жұмыс «Алматы» ауданының аумағында, атап айтқанда, айналма жолға іргелес жатқан учаскеде жүргізілді. Акция барысында 300-ден астам қап қоқыс жиналып, аумақ тұрмыстық және басқа да қалдықтардан тазартылды. Атқарылған жұмыс жоғары нәтиже көрсетіп, қала тазалығын сақтауға елеулі үлес қосты», – деп атап өтті елордалық Жастар саясаты мәселелері жөніндегі басқарманың өкілі Ерлан Айдар.
Ұйымдастырушылар «Таза бейсенбі» акциясы елордадағы экологиялық жағдайды жақсарту жөніндегі жүйелі жұмыстың бір бөлігіне айналғанын баса айтты.
Жоба аясында жастарды қоғамдық пайдалы қызметке тартуға ерекше көңіл бөлінеді. «Жасыл ел» қатысушылары еңбек тәжірибесін алып қана қоймай, елорданы абаттандыру мен көгалдандыруға нақты үлес қосады.
Айта кету керек, биыл «Жасыл ел» жастар еңбек жасақтарының XXII еңбек маусымы басталды. Биылғы маусымда елордада 14 пен 35 жас аралығындағы 5 200-ден астам жасты маусымдық жұмыспен қамту жоспарланып отыр. «Таза бейсенбі» экологиялық акциясы бірлескен күш-жігердің арқасында қаланы таза, жайлы және өмір сүру үшін қауіпсіз етуге болатынын тағы бір мәрте дәлелдеді.
Еске салсақ, депутат Адамбеков «Таза Қазақстан» қағидаттарын барлық саяси партиялар бағдарламаларының бір бөлігіне айналдыруды ұсынды.
