Астанада №8 және №16 өрт сөндіру бөлімдері жөнделіп жатыр

Фото: Табиғат Зейнұлқабденнің Instagram парақшасынан алынды

Елордалық мәслихат депутаттары қаланың ескі бөлігінде орналасқан №8 және №16 өрт сөндіру бөлімдерінің жұмысымен танысты. Бұл туралы Астана қаласы мәслихатының төрағасы Табиғат Зейнұлқабден әлеуметтік желіде жазды, деп хабарлайды Elordainfo.kz.

Оның сөзінше, қазіргі уақытта екі нысанда да жөндеу жұмыстары жүріп жатыр.

«№8 өрт сөндіру бөлімі 1980 жылы салынған. Мұнда 60 қызметкер жұмыс істейді, 6 бірлік техника бар. Жөндеу жұмыстары 2026 жылы аяқталады деп жоспарланған.

№16 өрт сөндіру бөлімі 1979 жылы пайдалануға берілген. Бөлімде 52 қызметкер қызмет атқарады, 5 бірлік техника жұмылдырылған. Нысанды жөндеу 2026 жылдың тамызына дейін жалғасады.

Өрт сөндіру бөлімдерінде қызметкерлер үшін қолайлы жағдай жасалып, техникаға арналған бокстар кеңейтіліп, бөлімшелердің инфрақұрылымы жаңғыртылуда.

Сондай-ақ депутаттар арнайы техникалардың жаңартылуымен, заманауи жабдықтардың сатып алынуымен, сондай-ақ арнайы киім-кешек, құрал-жабдықтар және өрт сөндіруге арналған жаңа құралдармен танысты», деп жазды Табиғат Зейнұлқабден.

Мәслихат төрағасы аталған шараларды кезең-кезеңімен жүзеге асыру елорданың қауіпсіздік деңгейін арттыруға, бөлімшелердің материалдық-техникалық базасын нығайтуға және ТЖД қызметкерлеріне лайықты еңбек жағдайларын жасауға бағытталғанын атап өтті.

Еске салсақ, Президент Жеңіс Қасымбекке елорданы дамытуға қатысты бірқатар тапсырма берді.