Синоптиктер қазан айында елімізде ауа райы қандай болатынын айтты

Қазгидромет қазан айына арналған ауа райының консультативтік болжамын ұсынды, деп хабарлайды Elordainfo.kz.

Синопткитердің болжауынша, қазан айында ауаның орташа айлық температурасы республиканың басым бөлігінде климаттық нормадан 1–2°С жоғары, ал Шығыс Қазақстан облысында, Павлодар облысының солтүстік-шығыс жартысында және Абай облысында норма шамасында болмақ.

«Қазан айында жауын-шашын мөлшері республиканың басым бөлігінде норма шамасында болады. Батыс Қазақстан облысының басым бөлігінде, Атырау облысының батысында, Маңғыстау облысының батысында, Ақтөбе облысының солтүстігінде, Қостанай облысының солтүстік-батысында нормадан жоғары жауын-шашын түседі.

Ал Жамбыл облысының басым бөлігінде, Жетісу облысында, Қызылорда облысының оңтүстік-шығыс жартысында, Ұлытау облысында, Қарағанды облысының оңтүстік жартысында, Абай облысында, Түркістан облысының солтүстік жартысында және Алматы облыстарында жауын-шашын мөлшері нормадан аз болады», делінген болжамда.

Мамандардың айтуынша, еліміздің басым бөлігінде ауаның орташа айлық температурасы +3…+10°С, республиканың оңтүстік жартысында +11…+16°С аралығында болуы ықтимал.

Еске салсақ, синоптиктер қыркүйекте еліміздің барлық аумағында ауаның орташа айлық температурасы тамыз айымен салыстырғанда біртіндеп 5–7 градусқа төмендейтінін болжаған еді.