Сайлау учаскелерінде азаматтарды тексеру және тіркеу онлайн сервистері іске қосылады

Фото: Оңалхан Өнерхан

23 тамызда сайлау учаскелерінде арнайы онлайн сервистер іске қосылады. Аталған сервистерді енгізу сайлаушыларды толық есепке алуды қамтамасыз етуге және азаматтардың конституциялық сайлау құқығын іске асыруы үшін қосымша жағдай жасауға бағытталған, деп хабарлайды Elordainfo.kz Орталық сайлау комиссиясына сілтеме жасап.

Бірінші сервис сайлау учаскесінің өзінде азаматтың тұрғылықты жері бойынша тіркелуінің бар-жоғын тексеруге мүмкіндік береді.

Екіншісі -сайлау учаскесінің мекенжайы бойынша уақытша тіркеуді жүзеге асырады.

Атап айтқанда, тіркеуді тексеру сервисін сайлау комиссияларының мүшелері сайлаушылар тізіміне енгізілмеген азамат өтініш білдірген кезде пайдаланады. Егер тексеру нәтижесінде азаматтың сайлау учаскесінің шекарасындағы мекенжай бойынша тұрақты тіркеуі бар екені анықталса, сайлау комиссиясы оны сайлаушылар тізіміне енгізіп, оған бюллетень береді. Осыдан кейін азамат дауыс бере алады. Бұл сервис бүкіл ел бойынша 5 106 сайлау учаскесінде қолжетімді.

«Егер Қазақстанда тұрғылықты жеріңіз бойынша тіркеуіңіз болмаса, «Уақытша тіркеу» сервисін пайдалануға болады. Бұл күні 221 сайлау учаскесінде «шағын ХҚКО» жұмыс істейді. Олардың қызметкерлері азаматтарды сайлау учаскесінің мекенжайы бойынша уақытша тіркей алады. Тіркеуден өтіп, деректер тексерілгеннен кейін азамат сайлаушылар тізіміне енгізіліп, оған дауыс беру үшін бюллетень беріледі», делінген хабарламада.