Полиция велосипедпен жүргенде қауіпсіздік талаптарын сақтауға шақырды

Фото: Оңалхан Өнерхан

Жаз мезгілінде велосипед пен электрсамокат пайдаланушылар саны сөзсіз артады. Осыған байланысты полиция жол қозғалысына қатысушыларға қауіпсіздік талаптарын сақтаудың маңызын еске салады, деп хабарлайды Elordainfo.kz.

Тәртіп сақшылары жолға шығар алдында қорғаныш дулығасын киіп, велосипедтің техникалық жағдайын тексеруге кеңес береді. Тежегіш жүйесі, руль, дөңгелектер мен жарық беру құрылғылары жарамды болуы тиіс.

«Велосипедшілер арнайы веложолақтармен жүріп, жол белгілері мен бағдаршам талаптарын сақтауы қажет.

Жаяу жүргіншілер өткелінен өткен кезде велосипедтен түсіп, жолды жаяу кесіп өткен жөн», - делінген хабарламада.

Полиция қозғалыс кезінде телефон пайдаланудан, құлаққап тағудан және қауіпті маневрлер жасаудан бас тартуға шақырады. Полиция азаматтарды жол қозғалысы мәдениетін сақтап, өз қауіпсіздігі мен айналасындағылардың қауіпсіздігіне жауапкершілікпен қарауға шақырады.

Еске сала кетейік, елордада қауіпті дрифт жасаған жүргізуші жауапқа тартылды.