Жалақы 2 млн-нан 300 мыңға дейін: Электрондық еңбек биржасында 53 мыңнан астам бос жұмыс орны ұсынылды

Фото: Еңбек және халықты әлеуметтік қорғау министрлігі

Жұмыс берушілер білім беру, денсаулық сақтау, құрылыс, өндіріс, көлік және логистика салаларына мамандар іздеп жатыр. Сонымен қатар арнайы мамандығы немесе кәсіби тәжірибесі жоқ азаматтарға да лайықты жұмыс орындары ұсынылған, деп хабарлайды Elordainfo.kz ҚР Еңбек және халықты әлеуметтік қорғау министрлігіне сілтеме жасап.

Ұсынылатын жалақы көлемі маманның кәсібіне, біліктілігіне және жұмыс тәжірибесіне қарай өзгереді. Қазіргі таңда 11 мыңнан астам бос жұмыс орны бойынша жалақы мөлшері 300 мың теңгеден жоғары.

Білікті мамандар үшін жоғары жалақысы бар жұмыс орындары да бар. Мәселен:

• IT саласында – 2 миллион теңгеге дейін;

• өндіріс саласында – 1,7 миллион теңгеге дейін;

• құрылыс саласында – 1,2 миллион теңгеге дейін;

• ауыл шаруашылығы және денсаулық сақтау салаларында – 1 миллион теңгеге дейін;

• білім беру саласында – 750 мың теңгеге дейін жалақы ұсынылады.

«Жұмыс іздеп жүрген немесе кәсіби бағытын өзгерткісі келетін азаматтар Электрондық еңбек биржасы арқылы өзіне қолайлы вакансияны тауып, жаңа мүмкіндіктерге жол аша алады», делінген хабарламада.

Еске салсақ, Астанада 4 мыңнан астам жас жұмыспен қамту бағдарламаларына қатысты.