Header Banner

Елордалық боксшылар Қазақстан чемпионатында үш медаль жеңіп алды

Бүгін, 19:17
Жібек Наурыз Жібек Наурыз
Елордалық боксшылар Қазақстан чемпионатында үш медаль жеңіп алды
Фото: Қазақстан бокс федерациясы

Астанада 2009–2010 жылдары туған жасөспірімдер арасында бокстан Қазақстан Республикасының чемпионаты аяқталды, деп хабарлайды Elordainfo.kz Қазақстан бокс федерациясына сілтеме жасап. 

Ел біріншілігінің қорытындысы бойынша елордалық спортшылар екі алтын және бір күміс медаль жеңіп алып, жалпыкомандалық есепте үшінші орынға ие болды. Сонымен қатар Астана қаласының өкілі Досжан Жұмақан турнирдің «Үздік боксшысы» атанды.

16–22 қараша аралығында «Beeline Arena» ұлттық теннис орталығында өткен ел чемпионатына еліміздің 17 облысы мен Астана, Алматы және Шымкент қалаларынан 346 боксшы қатысты. Жарыста 10 салмақ дәрежесі бойынша жеңімпаздар мен жүлдегерлер анықталды.

22 қарашада өткен финалдық жекпе-жектерде Астана қаласының үш боксшысы шаршы алаңға шығып, ел чемпионы атағы үшін сынға түсті.

65 келі салмақ дәрежесінде Досжан Жұмақан финалда Алматы қаласының өкілі Эмир Мұхитпен кездесті. Тартысты өткен жекпе-жекте елордалық боксшы төрешілердің 3:2 есебімен қабылдаған шешімі бойынша жеңіске жетіп, Қазақстан чемпионы атанды. Сонымен қатар Досжан Жұмақан жарыс қорытындысы бойынша «Үздік боксшы» номинациясының иегері атанды.



 

Елорда қоржынына екінші алтын медальді 90 келі салмақ дәрежесінде өнер көрсеткен Сабыржан Сағым салды. Ол ақтық сында Жетісу облысының өкілі Рамазан Қазнабаймен кездесіп, төрешілердің бірауыздан қабылдаған шешімімен 5:0 есебімен басым түсті. Осылайша, Сабыржан Сағым өз салмағында Қазақстан чемпионы атанды.

Ал 50 келі салмақ дәрежесінде бақ сынаған Ален Мұхитұлы ел чемпионатының күміс жүлдегері атанды. Финалдық кездесуде ол Шығыс Қазақстан облысының боксшысы Арман Мырсабитпен жұдырықтасты. Жекпе-жек қарсыласының пайдасына 5:0 есебімен аяқталып, елордалық спортшы күміс медальді еншіледі.

Айта кетейік, елордалық үш боксшы да жартылай финалдық кездесулерде қарсыластарынан басым түсіп, ақтық сынға жолдама алған болатын. Атап айтқанда, Досжан Жұмақан Абай облысының өкілі Әзиз Дулатты 5:0 есебімен жеңсе, Сабыржан Сағым Шығыс Қазақстан облысының боксшысы Ринат Ерболұлынан дәл осындай есеппен басым түсті. Ал Ален Мұхитұлы Алматы облысының өкілі Ислам Болатбекті жеңіп, финалға шықты.

Чемпионат қорытындысы бойынша жалпыкомандалық есепте Шығыс Қазақстан облысының құрамасы екі алтын, бір күміс және үш қола медальмен бірінші орынға ие болды. Екі алтын, бір күміс және бір қола медаль жеңіп алған Жамбыл облысының командасы екінші орынға тұрақтады.

Ал Астана қаласының құрамасы екі алтын және бір күміс медальмен жалпыкомандалық есепте үздік үштікті түйіндеді.

Осылайша, елордалық боксшылар Қазақстан чемпионатын үш жүлдемен қорытындылап, екі чемпиондық атаққа қол жеткізді. Сондай-ақ Досжан Жұмақанның турнирдің үздік боксшысы атануы Астана құрамасының жетістігін толықтыра түсті.

Ел біріншілігі жас боксшылардың шеберлігін шыңдап, жарыс тәжірибесін арттыруға және әр салмақ дәрежесіндегі үздік спортшыларды анықтауға мүмкіндік берді.