Астанада Мансап орталығы үш мекенжайда жұмыс істей бастады

Астанада тұрғындарға қолайлы болу үшін Мансап орталығы енді үш жерде жұмыс істейді, деп хабарлайды Elordainfo.kz Астана әкімдігіне сілтеме жасап. 

Орталықтар қаланың бірнеше ауданын қамтиды:

- Есіл–Нұра аудандары бойынша Достық даңғылы, 13;

- Сарыарқа–Байқоңыр аудандары бойынша Бейбітшілік көшесі, 9;

- Алматы–Сарайшық аудандары бойынша А. Байтұрсынұлы көшесі, 29/2 ғимаратында қызмет көрсетеді.

Соңғы үш ай ішінде Мансап орталығының жұмыспен қамту шараларына 5160 адам қатысқан, оның 2560-ы — жастар.

Жұмыс тәжірибесі жоқ түлектер үшін «Жастар практикасы» бағдарламасы қарастырылған. Бағдарлама аясында ай сайын 130 мың теңге көлемінде жалақы төленеді. Қазіргі таңда 400-ден астам жұмыс беруші 1500 бос жұмыс орнын ұсынып отыр.

Ал 50 жастан асқан азаматтарға «Күміс жас» бағдарламасына қатысу мүмкіндігі беріледі. Бұл жоба бойынша қатысушылар 3 жылға дейін жұмыспен қамтылып, жалақысының 70%-ына дейін мемлекет тарапынан субсидияланады.

Сонымен қатар, кадр тапшылығын сезінген жұмыс берушілер қысқа мерзімді оқыту курстарын ұйымдастыруға өтінім бере алады.

Бұдан бөлек, Enbek.kz электрондық еңбек биржасында 1900 ұйым тарапынан 5000-нан астам бос жұмыс орны жарияланған.

Еске салайық, HR Enbek порталында еңбек шарттарындағы деректерді түзету функционалы іске қосылды.