Жыл басынан бері заңсыз айналымнан 1200-ден астам қару тәркіленді

Фото: polisia.kz

Ішкі істер министрлігі құқықтық тәртіпті нығайту және заңсыз қару айналымын тоқтату бойынша кешенді шараларды жалғастыруда, деп хабарлайды Elordainfo.kz Polisia.kz-ке сілтеме жасап.

Биылғы жылдың бес айында "Қару" және "Құқықтық тәртіп" жедел-профилактикалық іс-шаралары барысында қылмыстық айналымдағы 1200-ден астам қару тәркіленді. Олардың ішінде: 18 автомат, екі гранатаатқышғ 320-дан астам тапанша, 100-ден астам ойық ұңғылы қару, 700 тегіс ұңғылы мылтық, қаңтар оқиғасы кезінде қолды болған 120 қару да бар.

- Мамыр айында Алматы қаласы мен Алматы облысында тіркелмеген бірқатар қару тәркіленді. Олардың арасында қаңтар оқиғасы кезінде оңтүстік мегаполистегі қару дүкендерінен ұрланған қарулар да анықталды. Сонымен қатар 20 сәуірден бастап жыл соңына дейін халықтан заңсыз сақталған атыс қаруын, оқ-дәрілер мен жарылғыш заттарды сатып алу акциясы жүргізілуде. Бүгінгі күні азаматтар шамамен 750 түрлі қару мен 4 мыңға жуық оқ-дәріні ерікті түрде тапсырды. Ішкі істер министрлігі заңсыз сақталған қаруды өз еркімен тапсырған азаматтар қылмыстық және әкімшілік жауапкершіліктен босатылатынын еске салады. Азаматтарды сақтауға заңды негіз жоқ қаруды тапсырып, қоғамдық қауіпсіздікті қамтамасыз етуге өз үлестерін қосуға шақырамыз, - деді ІІМ криминалдық полиция департаментінің бастығы Қанат Нұрмағамбетов.

Еске салсақ, Ақмола облысында полицейлер 6-қабаттан секірмек болған қызды құтқарып қалды.