Direct to Cell технологиясы Қазақстанның кез келген жерінде қосымша құрылғыларсыз мобильді байланысты қамтамасыз етеді, деп хабарлады Elordainfo.kz ҚР Жасанды интеллект және цифрлық даму министрлігінің баспасөз қызметіне сілтеме жасап.
VEON Ltd. (Nasdaq: VEON), жаһандық цифрлы оператор, Қазақстанның бүкіл аумағында, соның ішінде жерүсті желілерімен қамтылмаған шалғай өңірлерде де қолжетімді спутниктік байланысты қамтамасыз ету үшін Beeline Қазақстанның Starlink Direct to Cell-мен серіктесетінін жариялады. Қыркүйекте жасалған коммерциялық келісімге сәйкес, Beeline Қазақстан 2026 жылы хабарламалар алмасу қызметін, одан кейінгі кезеңде мобильді интернетке қосылу қызметін қосуды жоспарлап отыр.
Қазақстан Республикасының Президенті Қасым‑Жомарт Тоқаевтың АҚШ‑қа ресми сапары барысында үшжақты кездесу өтті. Кездесуде Beeline Қазақстан мен Қазақстан Республикасының Жасанды интеллект және цифрлық даму министрлігі Direct to Cell спутниктік байланысын енгізу жоспарын қолдай отырып, өзара түсіністік туралы меморандумға қол қойды.
Beeline Қазақстан аумағы жағынан әлемде тоғызыншы орын алатын елдің шалғай әрі оқшауланған елдімекендерін тұрақты мобильді интернетпен қамтамасыз етуге бағытталған бастамаларды іске асыруды жалғастыруда. Бұған дейін компания тұрғындардың саны 100-ге жетпейтін ауылдарға дейін жерүсті желісінің қамтылуын кеңейтіп, автономды базалық станцияларды қуаттандыру үшін күн панельдерін орнатқан.
«Starlink-пен серіктестігіміз – жаһандық технологиялар ұлттық инфрақұрылымды қалай нығайта алатынының айқын мысалы. Бұл келісім орбиталық желіні ұялы байланыс желісімен біріктіру арқылы қамтуды кеңейтіп, дәстүрлі инфрақұрылымды өткізу экономикалық жағынан тиімсіз жерлерде байланысты қамтамасыз етеді. Ұялы байланыс жоқ жерде, бірақ тікелей спутникпен қосылу мүмкіндігі бар жерде модемдер мен қосымша құрылғыларсыз-ақ телефоннан хабарлама жіберу мүмкіндігі – азаматтарымыздың қауіпсіздігін қамтамасыз етіп қана қоймай, шын мәнінде, адам өмірін де сақтап қалуға мүмкіндік береді», - деді ҚР Премьер‑министрінің орынбасары – Жасанды интеллект және цифрлық даму министрі Жаслан Мәдиев.
Beeline Қазақстан холдингінің бас директоры Евгений Настрадин бұл серіктестік Қазақстанның толық цифрлы байланысқа өту жолындағы маңызды қадам екенін атап өтті .
«Біздің мақсатымыз – таулы жерлерден бастап, бос жатқан жерлерге дейін тұрақты байланыспен қамтамасыз ету. Ал Starlink Direct-to-Cell спутниктік технологиясын жердегі инфрақұрылыммен біріктіру бізді осы мақсатқа жақындатады. Бұл елдің шалғай жерлерін байланыспен қамту тұрғысынан тиімді шешім», - деді ол.
VEON сондай-ақ Starlink компаниясымен ғаламдық негіздемелік келісімге қол қойды. Бұл келісім VEON компаниясы жұмыс істейтін барлық елдерде Direct to Cell спутниктік байланысын енгізу бойынша болашақ ынтымақтастықтың шарттарын айқындайтын эксклюзивті емес келісім болып саналады. VEON Starlink-пен осындай көпжақты келісімге қол қойған алғашқы жаһандық телеком-оператор.
Beeline Қазақстанның Starlink Direct to Cell спутниктік байланысын енгізу жөніндегі келісімі биыл Украинада Kyivstar Group Ltd компаниясы Starlink Direct to Cell арқылы хабарламалар алмасудың сәтті демонстрациясын өткізген соң қол жеткізілген табысты тәжірибеге негізделген.
«Біз жұмыс жасайтын нарықтардың бірегей жағдайлары қауымдастықтардың байланыста болуын қамтамасыз ететін инновациялық шешімдерді талап етеді. Украинадан кейін VEON тобының екінші өңірі – Қазақстанда Starlink Direct to Cell‑мен ынтымақтастықтың арқасында дұрыс бағытта келе жатқанымызды көру мені қуантады. Біз VEON-ның бес елдегі 150 миллионнан астам абоненті үшін жерүсті және спутниктік байланысты біріктіру мүмкіндіктерін үлкен қызығушылықпен қарастырып жатырмыз», - деді VEON Group бас директоры Каан Терзиоғлы.
Қазақстанда Starlink Direct to Cell қызметін сынақтан өткізу және коммерциялық іске қосу стандартты реттеуші рәсімдерді сақтай отырып жүзеге асырылмақ.
Айта кетсек, VEON компаниясы – шамамен 160 млн клиентке конвергентті байланыс қызметтері мен цифрлық сервистерді ұсынатын цифрлы оператор. Компания бүкіл әлемнің 6 пайыздан астамы тұратын бес елде жұмыс істейді және адамдардың өмірін жеке дамуға әрі экономикалық өсімге ықпал ететін технологиялар арқылы өзгертеді. VEON NASDAQ биржасында тіркелген.
Ал Starlink Direct to Cell — төменгі Жер орбитасында орналасқан 650‑ден астам спутниктен тұратын әлемдегі ең ірі спутниктік топтама, мобильді желі жоқ аймақтарда деректерді жіберуді, дауыс байланысын, видео және хабарлама алмасуды қамтамасыз етеді. Бес континентте 7 миллионнан астам пайдаланушы бұл технологияға қосылған. Direct to Cell спутниктері кәдімгі LTE‑смартфондармен жұмыс істейді – аспан көрінсе жеткілікті. Олар ғарыштағы ұялы байланыс мұнаралары сияқты жұмыс істейді, ең озық фазалы антенналармен жабдықталған және Starlink желісі аясында бір‑бірімен лазерлі арналар арқылы байланысады, роуминг қағидаты бойынша мобильді желілермен үйлестіруді қамтамасыз етеді. Starlink — әлемдегі ең ірі 4G желісінің жабдықтаушысы және мобильді операторлардың әлемдік серіктесі.
Beeline Қазақстан мобильді байланыс саласында 11 миллион, ал орнықты интернет сегментінде 2 миллион клиентке қызмет көрсетеді. 2018 жылдан бері компания цифрлы оператор стратегиясын жүзеге асырып келеді. Соңғы бес жылда цифрлы шешімдер әзірлеудегі тәжірибесін пайдалана отырып, Beeline Қазақстан 60 ішкі және сыртқы өнімнен тұратын экожүйе құрды. Beeline Қазақстан акцияларының қадағалау үлесі VEON компаниясына тиесілі.
