СҚО-да қар құрсауында қалған балалы отбасы құтқарылды

Фото: https://t.me/qr_tjm

Төтеншеліктер Тимирязев ауданында автожолда қар құрсауында қалған бір отбасын құтқарды, деп хабарлайды Elordainfo.kz ТЖМ баспасөз қызметіне сілтеме жасап.

Көліктің ішінде ерлі-зайыптылар және екі бала болған. Сонымен қатар әйел адамның жүкті болуы жағдайды одан әрі күрделендірді.

Оқиға орнына жедел жеткен ТЖМ құтқарушылары автокөлікті тазартылған жол бөлігіне сүйреп шығарды. Одан кейін құтқарушылар отбасын Тимирязево ауылына дейін жеткізді.

Зардап шеккендер жоқ, медициналық көмек қажет болған жоқ.

ТЖМ жүргізушілерді қолайсыз ауа райы жағдайында жолда барынша мұқият болуға және мүмкіндігінше алыс сапарлардан бас тартуға шақырады.

Еске салайық, бұдан бұрын Абай облысында көлікте ұйықтап кеткен екі адам уланып көз жұмғаны туралы жаздық.