Іздеу 
Думан Аманжол
Денсаулық сақтау министрлігі Ресей Федерациясының Иркутск облысында аса қауіпті инфекция туралы хабарламаға байланысты ондағы эпидемиологиялық ахуалды бақылауда ұстап отыр, деп хабарлайды Elordainfo.kz.
Ведомство мәліметініше, Қазақстанда жағдай тұрақты бақылауда, алдын алу сипатындағы қажетті шаралар қабылданды. Мемлекеттік шекара арқылы өткізу пункттерінде санитариялық-карантиндік бақылау жүргізілуде.
«Көліктің барлық түрлерінде дене қызуы жоғарылаған, ауру белгілері немесе аса қауіпті инфекцияға күдігі бар адамдар анықталған жоқ», - делінген хабарламада.
Алдын ала бағалау бойынша, инфекцияның Қазақстанға әкеліну қаупі төмен деңгейде қалып отыр. Жағдайға баға беру және қабылданып жатқан шаралар ресми ақпараттың түсуіне қарай нақтыланатын болады.
Егер сапардан соң ауру белгілері пайда болған жағдайда азаматтар медициналық көмекке уақтылы жүгініп, дәрігерге болған жері мен сапар күндерін хабарлау қажет.
ДСМ сондай-ақ азаматтарға ресми ақпарат көздеріне ғана сенуге кеңес береді.
«Қолда бар мәліметтерге сәйкес, қазіргі уақытта ресейлік мамандар эпидемиологиялық тергеп-тексеру жүргізіп жатыр. Қорытынды диагноз әзірге ресми түрде расталған жоқ, ықтимал жұқтыру көзі мен мән-жайлары анықталуда», - деп хабарлады ДСМ.
Медициналық бақылауда 197 байланыста болған адам бар. Қолда бар мәліметтер бойынша, олардан ауру белгілері анықталған жоқ, зертханалық зерттеу нәтижелері теріс. Шелехов аудандық ауруханасында қажетті эпидемияға қарсы іс-шаралар жүргізілуде.
Айта кетейік, 4 қазанда Роспотребнадзордың баспасөз қызметі Иркутск облысында, Иркутск қаласында және Шелеховта санитариялық-эпидемиологиялық жағдай тұрақты екенін және оба ауруының жағдайлары анықталмағанын хабарлады. Иркутск облысында 28 жастағы әйелдің қайтыс болу себебі этиологиясы анықталмаған пневмония ретінде сипатталуда.
Еске салсақ, елімізде медицина қызметкерлерінің кәсіби жауапкершілігін міндетті сақтандыру жүйесі аясында соңғы екі жылда пациенттер мен олардың отбасыларына 502,6 млн теңгеден астам сақтандыру төлемі жасалды.
